جان پیمبر قیزی معصومه دی
حضرت حیدر قیزی معصومه دی
ساقی کوثر قیزی معصومه دی
موسی جعفر قیزی معصومه دی
باب حوائجدی آدی عالمه
صدقیله فریاد ایله یا فاطمه
...
برج ولا اختری معصومه دی
فاطمه ی دیگری معصومه دی
شاهیمیزون خواهری معصومه دی
ملکیمیوزون سروری معصومه دی
گنبدینه زائر ایدور زمزمه
قربان اولوم قبریوه یا فاطمه
...
آدی گلنده آپارور غملری
واله ایدور حوریلن آدملری
رشکه سالور هاجر و مریملری
رتبه ویرو، بیش ایلیور کملری
داشه نظر ایلسه غوغا ایدر
بهجتی دنیایه مسیحا ایدر!
...
قدری تحیرده قویوب عالمی
قبری تکاپویه سالور آدمی
آیت العظمی یارادور هر دمی
گنبدینون اوسته اسور پرچمی
پرچمینون نقشی بودور برملا..
..حضرت سلطان خراسان؛ رضا
...
نقل ایلیور بو خبری بیر نفر
چون سندی واردی اولوب معتبر
حضرت صادق بیزی ایلوب خبر:..
..قمدا نوه ام دفن اولاجاق خونجگر
مرقدینون دورینه صف باغلیون
گرم ایلیون یاسینی سیز آغلیون
...
عرض ایدورم سیدنا عفو ایله
عشقیدی بو قلبیمیز ایلور گله
دوزدی که قمدان تاپورام فاصله
آختارورام شامیده بیر قافله
قم نه عزیز ایتدی رضا کوکبین؟
شامیده گور فاطمه نون زینبین
...
قوللارینی باغلادیلار ویردیلار
قلب ایوینی داغلادیلار ویردیلار
یولدا نه چوخ ساخلادیلار ویردیلار
تا بالالار آغلادیلار ویردیلار
داشلار اونون قلبینی یاندیردیلار
قارداشینی قانه بویاندیردیلار
شاعر: اکبر پورآقا
.: Weblog Themes By Pichak :.
