یاالله
شب رحمتدی شب لطف وعطا یا الله
شب غفران ومناجات ودعا یاالله
خون دل اشک روانیله آخور رخساره
یوزوموزده یازا هرقطره سی تا یا الله
قلبیمیز هرضرباندا سنه لبیک دیور
سنون عشقونده ویرور صبح ومسا یا الله
آچ کرامت قاپوسین چوخدی اورکده یارامیز
کرمونله ایله هر درده دوا یا الله
---
ای ید قدرتیله عالمی یوخدان یارادان
ید قدرتله ویرن عالم امکانه تکان
داغلار آلتندا ویرن چشمه لره آب روان
یرده کی خاکه ویرن قدرت اعجازیله جان
جان انسانه عنایت ایلین روح وروان
روح انسانلارا تزریق ایلین فکر وبیان
گجه نی گوندوز ایدن گوندوزوده تیره نشان
بشر اندیشه وادراکینی حیرتده قویان
خالق لم یزل ارض وسما یا الله
کرمونله ایله هر درده دوا یا الله
---
یارادان جمله سماوات وکراتی سن سن
بشره بذل ایلین آب حیاتی سن سن
گورن آسان خلوات وجلواتی سن سن
گورسدن هربشره راه نجاتی سن سن
ویرن هرحسنه هزاران حسناتی سن سن
حسناتیله چوخالدان درجاتی سن سن
عرشیدن نازل ایدن هربرکاتی سن سن
ماضی تک سن سن ومستقبل و آتی سن سن
سن بقاسن یارانان جمله فنا یا الله
کرمونله ایله هر درده دوا یا الله
---
بشری خلق ایلدون پیکرینه سر ویردون
سرینه عقل سلیم،عقلینه باور ویردون
محکه چکدون اونون باورینون مرتبه سین
اونون ئوز باوری اندازه سی گوهر ویردون
جاهل اعرابی بوتون غرق ایلدون ظلمتده
خلقتونله اولارا پاسخ برتر وبردون
قیزلارون زنده بگور اولماقینون عصرینده
ائوین آباد اولا پیغمبره کوثر ویردون
اونی خلق ایلدون عالم یارانا یا الله
کرمونله ایله هر درده دوا یا الله
---
کوثری خلق ایلدون حیدر وطاها یارانا
حسنین عزت واکرامیله زیبا یارانا
پنج تن خاطرینه قلبلری پنج ایلدون
تا اورکلرده تبری و تولا یارانا
پنج تن قویدی قدم قلبلره باعث اولوب
خانه عشقه گوره جنت الاعلا یارانا
خلقتین فلسفه سیندن صورا معلوم اولدی
یارانان جمله بهانه یدی که زهرا یارانا
یارادان سن ، یارانان اهل کسا یاالله
کرمونله ایله هر درده دوا یاالله
---
دل عاشقلری بیر قانلی لوایه سالدون
باشلارا قانلی لوائیله نه سایه سالدون
ایلدون چوخلارینی کرب وبلانین دلیسی
حرم عشقنده عجب حال وهوایه سالدون
عاقبت آدمیله نوحی ده چکدون اوچوله
تا باغشلاندیراسان آه ونوایه سالدون
اولارین که اورگین غصه وغم دولدوردی
بیربه بیر یولارینی کرب وبلایه سالدون
قلبیدن ایلدیلر آه ونوا یاالله
کرمونله ایله هردرده دوا یاالله
---
کربلا آدی اورک مملکتین قان ایلیور
کربلایه گلنون دردینه درمان ایلیور
سائل درگهنه لطف فراوان ایلیور
مور اگرگلسه همان لحظه سلیمان ایلیور
به محمدبه علی،بالحسن وبالزهرا
بالحسین سسلینه دم به دم احسان ایلیور
کربلانین آدی گلجک دل عاشقلر اسور
جانینی گنبد وایوانینه قربان ایلیور
کربلادور اورایا عرش خدا یاالله
کرمونله ایله هر درده دوا یا الله
---
ذات حق قدرتین هریرده نمایان ایلدی
اویری قدرتیله وادی عرفان ایلدی
شهر طوسه قدمین قویدی امام هشتم
قدم پاکی خراسان یولون آسان ایلدی
سکز ایل پیرجماران دایانوب سنگرده
علوی ملکنی میدان شهیدان ایلدی
شهدا جانلارینی ایتدی فدا ایرانه
توکولن قانلاری ایرانی گلستان ایلدی
حرمت خون تمام شهدا یاالله
کرمونله ایله هردرده دوا یاالله
شاعر: استاد ابوالفضل فرهنگی
.: Weblog Themes By Pichak :.
