مهمان عفو
گلموشم من قاپووا عفووه مهمان ایده سن
فیض عامونده منه رحمت شایان ایده سن
مستحق عبدوه یارب گنه احسان ایده سن
بیر طبیبانه باخیب دردیمه درمان ایده سن
بویوروبسان در رحمت قاپوسین باز ایدرم
گلسه گر عبد خطاکار اونی پیشواز ایدرم
---
مرحمت ایلیدون آلله منه، عصیان ایلدیم
چوخ کرامت ایلدون من سنه طغیان ایلدیم
نعمت ارزان ایلدون من اونی کفران ایلدیم
نعمت افزون ایلدون کفر دو چندان ایلدیم
گل منی شامل عفو ایله خدایا بو گجه
عبدووه نازل ایله رزق و عطایا بو گجه
---
بار عامونده منی فیضووه دعوت ایلدون
نائل مرحمت و فیض ضیافت ایلدون
بو خطاکاریله سن یاخچی رفاقت ایلدون
بی لیاقت کسی دارای لیاقت ایلدون
هر سحر جلوه لنور شور ضیافت باشیما
کربلا یادی سالور شور زیارت باشیما
---
کربلاده دولانان گونلر عجب گونلریدی
نوح سنیندن اونون بیر نفسی برتریدی
میزبان حرم و خانه علی اکبریدی
سینه ی شاهیده مظلوم یاتان اصغریدی
آلتی گوشه حرمی مسکن و سامانیمدی
آقامون پاک آدی جانانیله ایمانیمدی
اکبر پورآقا
.: Weblog Themes By Pichak :.
