وهب و هانیه درکربلا
یاز قلم سن بو گجه، عشقیده تبدندی سوزوم
جلوه و تابش مه، در دل شبدندی سوزوم
صدقیله باشدا اولان شور وهبدندی سوزوم
کیمدی ثابت قدم اوز سلکینه خوش نامی اولار
اللهین وعده سیدی حق اهلینه هامی اولار
باجمالیدی وهب شأن و وقاری واریدی
مؤمنیدی عملینده حق شعاری واریدی
نیک خوئیدی، قوی نفس و قراری واریدی
صودی دوز اولسا کیمون عشقده با وفا اولار
هر نجور اولسا گیدوب زائر کربلا اولار
حق چکوبدی وهبی ثعلبیه ظاهر آدی
هم آنا هم گلینی قافلیده یانیندادی
تاب اولوب تشنه گزور وهب تاپا سو امدادی
چاتوب امداده بیری، وعده ی حق محکم اولوب
نیزه سین ووردی یره ، آب روان زمزم اولوب
گَلدی لب تشنه وهب گوردی سوؤین چشمه سینی
خبر آلدی آنادان واقعه نین قضیه سینی
دیدی بیر شخص گلوب ووردی یره نیزه سینی
بو بیاباندا بیزه یاور اولوب چشمه قازوب
ذهنمیه خیر عملیندن بوگون عیسانی سالوب
من دئیدی محضرینه اگر یتیشسم آناجان
گوررم کیمدی بو صحراده سو یردن چیخادان
دییرم بنده ی رحمان ایوون اولسون آبادان
ایستورم من تانیام کیمدی مسیحا کیمیدی
عصر تزویر و ریاده شأنی یحیا کیمیدی
حضورینه یتیشدی تز قلبی دولی شوق و شعف
عرض ایدوب آدون ندور بنده ی پرشور و شرف؟
مقصدوندن دِئگیلن ای قمر و شمس به کف
بویوروب خالقون ای بنده ی پاک و طاهری
ای وهب! منم حسین، کرب و بلا مسافری
ایستسه گر کرامتین هرکیمه حق شامل ایدر
خیردا بیر بهانیه رحمتینه نائل ایدر
بنده نین بیر قدمین یوز قدمه کامل ایدر
عبد کلبی بالاسی دینی اولان نصارانی
دینی اسلام اولوب کرب و بلا جولانی
یوم عاشور دئدی، امّ وهب! راضی اولارسان نجه سن؟
اوغلوا ویردیگون اوز درسیوی امضا ایده سن
بویوروب اوغلونا واجبدی که جنگه گیده سن
چون بو گون تکدی حسین یاری گَرَک سن اولاسان
باشوی هم جانوی سن بویولوندا گویاسان
گلدی القصه نجه شیر و شجاعانه گلور
مرد و مردانه وهب جانب جولانه گلور
تازه داماد کیمی حجلیه شاهانه گلور
اوخودی زاده ی کلبم ویرارام ضربتیمی
عرصه گَهده گوره جک کوفه لیلر هیبتیمی
ایندی من رزمه گلوب ایلییرم خونخواهی
سالارام باشینی کیم اولسا حسین بدخواهی
شوخلاقا گلمموشم تا ایلیم خودخواهی
آناجان اوغلوا باخ عرصه ده جولان ایلیور
یا حسین حسین دیور عشقیده طوفان ایلیور
تا وهب ایتدی درو بیر نچه کرکس آرادان
عزم خرگاه ایلیوب دلده وصال یارادان
قیلدی پرسش آنادان راضی اولبسان بالادان؟
دیدی دلبندینه، یالقوزدی نبی ریحانی
راضی اولّام او زمان تا اولاسان قربانی
تا ایشیدی بو سوزی تازه گلین گلدی دیله
ترک شیرین دئدی سن ایلمه آل قلبین اله
بیلورم گیتسه گولوم اولمیاجاق بیرده گله
گَل گیدک تا که وهب، محضر دلداره چاتاخ
بو حسینون بودا سن بلکه ره چاره تاپاخ
گلدیلر محضر شاهه ایکی دلداده مُرید
شوقیلن شور و شعف باشلارینا اولدی مزید
عرض ایدوب هانیه ای ناطق قرآن مجید
خواهشیم واردی منیم محضروه عبد شکور
ایتدی فرمایش حسین، دانیش گوروم سوزون ندور
قیلدی ابراز گیدور وامق و عذراسی قالور
عرصیه گیتسه وهب قلبیمه ایذاسی قالور
نو عروسیین گونی غمدن دولی دریاسی قالور
ای عجب دهریده تنها نجه شیرین قالاجاق
گیتمگی داغ داشا فرهادینه اما چاتاجاق
ایکی خواهش واریم ای سبط رسول مدنی
روز محشرده گرک آتمیا مجنون منی
بیرده واردور آقاجان بو قره بختون محنی
سوگولوم گیتسه اولار دهر، منه قوش قفسی
وئر کنیز قیزلاروا، غریب اولان بو بی کسی
تا ایشیتدی بو سوزی سرور و شاه شهدا
اشکیله دولدی گوزی آغلادی میر نجبا
بویوروب غم یمه ای عاشق باصدق و صفا
یتیشرسن اورگین سؤدوگی مطلبلره سن
اذن ویر تا که گیده رزمگهه، دلبره سن
عرصیه گلدی وهب شوقیله، هانیه باخور
وه عجب رزمی ایدور قاندی که صحرایه آخور
او رجز نغمه سی، لیلا ولی غملردن اوخور
تا که دوشدی وهبین قوللاری تندن آرالی
قاچدی میدانه طرف هانیه قلبی یارالی
تا گوروبدور وهبین هیکلنی قان بورویوب
غم چکن پیکرینی دلبره ساری سوریوب
گوردی که خسته دی مجنون، اونا لای لای اوخیوب
اشکیلی صورتینی گویدی یارالی یوزونه
جان دیدی کاش ویره لیلیسی مجنون یرینه
گوردی بو صحنه نی تا شمر حرامی و لعین
امر ایدوب نوکرینه مقتل ایله حجله گهین
شوقیلن سینه ی مجنونه دوشوبدی او گلین
داش یاغا کاش فلک فانی بو دنیا باشینا
دگدی بیر آهن عمود غمزده لیلا باشینا
اؤچی ویردی گینه ده تیر بلاسین هدفه
هانیه دُر ، وهبون سینه سی دوندی صدفه
وصلیده تازه گلین سبقت آلوبدور شرفه
لیلی گیتدی ولی مجنونی دوشوب ظلم شبه
کسدیلر یوللادیلار باشینی امّ وهبه
کیمدی بو امّ وهب، هاجر و سارا یریشی
کیمدی بو امّ وهب ، حضرت زهرا روشی
کیمدی بو امّ وهب ، زینب کبری منشی
بالانون باشینی آلدی اَله یول تلّه سالوب
تلّیدن آتّدی باشی شمره طرف سس اوجالوب
دیدی حقّه ویریلن فدیه نی من پس آلمارام
دین و آیینیمی من جاه و طلایه ساتمارام
کوفه اهلی دگولم، عهدیمی باشدان آتمارام
هرقدر جانیم اولا زینبه قربان ایدرم
یوز بئله اوغلوم اولا اکبره قربان ویررم
شعر: اکبر پورآقا
مطالب و لینک های مرتبط با شعر مزبور:
1- وَهَب بن عبدُالله بن عُمَیر حَبّاب الکَلبی- تبیان
2- وهب ابن عبدالله کلبی- ویکی فقه
.: Weblog Themes By Pichak :.
